ఫేస్బుక్.. ప్రపంచ వ్యాప్తంగా అత్యధికంగా ఇంటర్నెట్‌ యూజర్లు ఉపయోగిస్తున్న సోషల్ మీడియా యాప్‌లో ఒకటి. అలాంటి ఈ యాప్‌ కీలక నిర్ణయం తీసుకుంది. యాప్‌లో ఉన్న ఫేస్ రికగ్నైజేషన్‌ ఫీచర్‌ను ఆపేస్తున్నట్లు ఆ సంస్థ తన బ్లాగ్‌లో ప్రకటించింది. ఈ విషయాన్ని ఫేస్బుక్ ఆర్టిఫీషియ‌ల్ ఇంటెలిజెన్స్ విభాగ ఉపాధ్యక్షుడు జెరోమ్ పెసెంటి తన ఫేస్బుక్ బ్లాగ్‌లో పేర్కొన్నారు. దీంతో ప్రపంచ వ్యాప్తంగా వంద కోట్లకు పైగా ఉన్న ఫేస్బుక్ యూజర్ల ఫేషియల్ డేటా మొత్తం డిలీట్‌ కానుంది. ఫేషియల్ రికగ్నైజైషన్ కోసం ఉపయోగించే.. ఫేస్ ప్రింటర్లను కూడా తొలగించనున్నట్లు సంస్థ వెల్లడించింది.
రీజన్‌ ఇదేనా..?
ఫేస్బుక్ ఉపయోగిస్తున్న యూజర్లలో దాదాపు మూడొంతుల మంది ఈ ఫేస్ రికగ్నైజేషన్‌ ఫీచర్‌ను ఉపయోగిస్తున్నట్లు సమాచారం. అయితే గత కొద్ది రోజులుగా దీనిపై అభ్యంతరాలు ఎక్కువగా రావడంతో పాటు.. దీనికి సంబంధించి ప్రభుత్వాలు కూడా సరైన రూల్స్‌ను పెట్టలేకపోతుంది. దీంతో యూజర్‌ వ్యక్తిగత గోప్యతకు ఇబ్బంది కలిగేలా ఉందంటూ అభ్యంతరాలు వస్తుండటంతో.. ఈ ఫీచర్‌ను ఫేస్బుక్ తొలగించాలని భావించినట్లు తెలుస్తోంది.